29 MARY HAMILTON
WORD'S gane to the kitchen,
And word's gane to the ha,
That Marie Hamilton has born a bairn
To the hichest Stewart of a'.
She's tyed it in her apron
And she's thrown it in the sea;
Says, ‘Sink ye, swim ye, bonny wee babe,
You'll ne'er get mair o me.’
Down then cam the auld Queen,
Goud〖Gold.〗 tassels tying her hair:
‘O Marie, where's the bonny wee babe
That I heard greet〖Weep.〗 sae sair?’〖Sore.〗
‘There was never a babe intill〖Into, in.〗 my room,
As little designs to be;
It was but a touch o my sair side,
Came o'er my fair bodie.’
‘O Marie, put on your robes o black,
Or else your robes o brown,
For ye maun gang〖Must go.〗 wi me the night,
To see fair Edinbro town.’
‘I winna put on my robes o black,
Nor yet my robes o brown;
But I'll put on my robes o white,
To shine through Edinbro town.’
When she gaed up the Cannogate,
She laughd loud laughters three;
But when she cam down the Cannogate
The tear blinded her ee.
When she gaed up the Parliament stair,
The heel cam aff her shee;〖Shoe.〗
And lang or she cam down again
She was condemnd to dee.
When she came down the Cannogate,
The Cannogate sae free,
Many a ladie lookd o'er her window,
Weeping for this ladie.
‘Make never meen〖Moan.〗 for me,’ she says,
‘Make never meen for me;
Seek never grace frae a graceless face,
For that ye'll never see.
‘Bring me a bottle of wine,’ she says,
‘The best that eer ye hae,’〖Ever you have.〗
That I may drink to my weil-wishers,
And they may drink to me.
‘And here's to the jolly sailor lad
That sails upon the faem;
And let not my father nor mother get wit
But that I shall come again.
‘And here's to the jolly sailor lad
That sails upon the sea;
But let not my father nor mother get wit〖Knowledge.〗
O the death that I maun dee.
‘O little did my mother think,
The day she cradled me,
What lands I was to travel through,
What death I was to dee.
‘O little did my father think,
The day he held up me,
What lands I was to travel through,
What death I was to dee.
‘Last nicht I washd the Queen's feet,
And gently laid her down;
And a' the thanks I've gotten the nicht
To be hangd in Edinbro town!
‘Last nicht there was four Maries,
The nicht there'll be but three;
There was Marie Seton, and Marie Beton,
And Marie Carmichael, and me.’