13 THE TWA CORBIES〖Crows.〗
AS I was walking all alane,
I heard two corbies making a mane;
The tane unto the t' other say,
“Where sall we gang and dine to-day?”
“In behint yon auld fail〖Turf.〗 dyke,
I wot〖Know.〗 there lies a new slain knight;
And naebody kens〖Knows.〗 that he lies there,
But his hawk, his hound, and lady fair.
“His hound is to the hunting gane,
His hawk to fetch the wild-fowl hame,
His lady's ta'en another mate,
So we may mak our dinner sweet.
“Ye'll sit on his white hause-bane,〖Neck-bone.〗
And I'll pike out his bonny blue een;
Wi ae lock o his gowden hair
We'll theek〖Thatch.〗 our nest when it grows bare.
“Mony a one for him makes mane,〖Moan.〗
But nane sall ken where he is gane;
Oer his white banes when they are bare,
The wind sall blaw for evermair.”